NEEDE – De prieze van gas en stroom riest de panne oet. Wat leu kunt `t neet mear betalen allemoale,wat een nare toestand. Noe krieg ie allerlei tips van deskundigen hoe ie kunt bespoaren . In plaats van elken dag douchen noar 1 kear in de wekke en dan gin 20 minuten moar 10 of nog better 5 minuten. Ik sprak zelfs iemand den ging neet mear onder de douche moar olderwets an de pompe met kold water. Misschien is `t dan een idee um toch moar wear anderhalve meter afstand te goan hollen. Dat is misschien sowieso better veur ieders gezondheid. Ok sprak ik iemand den was bie een sport e goane, neet veur de beweaging moar dan kon ie noatied hearlijk oetgebreid douchen.
Bie de meeste verenigingen kun ie gratis een moand of wat met doon um te kieken of `t oe wat lik dus dat is dan helemoale gratis. Joa zegge den man ik zit noe een moand op voetbal en volgende wekke probear ik volleybal doarnoa goa ik bie de damclub. Ik zeg bie de damclub? Goat ze doar dan ok noatied onder de douche? Nea zeg e moar dan hoof ik mien hoes neet te stokken en kan ik met warme veute noar berre. Dus as ie creatief bunt kun ie een hoop bespoaren. Ik las in de krante dat iemand zich had loaten afsluuten van `t gas. Zee verwarmde noe de kamer met waxinelechjes onder ne terracotta pot. Ik wet neet of `t wat weard is dus ik wil dat ok eens oetprobearen. Heet water maakte ze met den waterkokker ,hoe dat dan met dochen geet stond der neet bie moar ik nem an dat `t mense onder de kolde pompe geet. Op zich is `t natuurljk neet arg um iets minder lux te leaven.
Al dee nieuwe fratsen bunt ze echt neudig?? Oaveral en altied bereikboar wean?? Vrogger hing der 1 bakkelieten telefoon in de kolde gang en gebroeken ie de krante as leste op de pot. Op onze sloapkamers stonden in de winter de bleume op `t raam en gin mense den doar oaver klagen. As `t tied was um noar berre te goan krop ie hearlijk onder den dikken wollen dekken en meestal lei der nog wal een breur bie oe in berre den ok nog luk hette afgaf. Eigenljk mot wij wear een betje terugge noar vrogger en lekker allemoale teglieke `t nus in tegen mekare an. Ik was van de wekke efkes wat holt an `t halen met de bakkersbusse veur de holtkachel ,kump der ne kearl langs fietsen en reart; hij bakker goa ie wear met takkebuske an `t bakken? Onderweg noar thoes hen mos ik der nog an denken olderwets bakken met takkebuske, dat zol wat wean moar dat is wal een pens vol wark en vrogger kosten `t warkvolk neet wat en dat is noe wal anders. Dus alles doon als vrogger is gin doon.
