NEEDE – Dreuge,dreuge,dreuge op `t moment dat ik dit schrief heb wij net oetgerekend onder de jammarkt een buitje ehad. Was nog ens neet zovulle en zolange moar genog dat net iedereene van stroate was. As ondernemmer arger ie oe dan kapot, wekkenlange is `t tropisch en oetgerekend met zon mooi iets kump `t van boaven.
Het was dan ok hooge tied want oaveral is `t grus al aardig dreuge en geil. Ik sprak der op de karmisse eene en den had `t deroaver dat `t zo dreuge in zien tuin was dat he smorgens de kamelen mos votjagen. Kamelen doar heb ik enige ervaring met want ik heb joaren een kameel e huurt veur de karsmarkt . Dat was wal heel biezonder altied. Jacob was de naam van den kameel en nog nooit had iemand op Jacob e reden. Jacob had nogal een biezondere tic, noa good honderd meter maakten he een sprongetje met alle veer peute in de loch.Noe dachten enkele familieleden dat `t een good idee was um mien efkes op Jacob te loaten rieden. Dus ik kroep tussen dee twee bultens, woarvan ik veronderstelden dat ze vol water zollen zitten, moar toen Jacob begon te springen marken ik wal dat der ok butte in dee bultens zatten. Kearl nog eens an too doar zwoksen wij hen, ik heb nog wekkenlang breed op `t spoar e lopen. Jacob was eigendom van een man oet Hengelo Gelderland en den had hum ne kear e wonnen met een lotterieje. Den man had nogal aardig in e nommen den oavond en had den kameel e wonnen. Met zien zatte kop had he dat beest onder de carport e zet. Smorgens toen he wakker werd zeg e tegen zien vrouwe: ik heb mien toch raar e dreumt ,ik heb e dreumt dat der hier ne kameel onder de carport stond. Stond? zeg ziene vrouwe stond? Goat moar eens kieken he steet der nog steeds. Jacob werd bie de buren in de weide e doane en ieder joar met kasmissen was der volop vroage noar een kameel. Dit is allemoale zuuver woar gebeurt moch ie doar an twiefelen.
