NEEDE – In vrogger tied, eigenlijk nog ens neet zo lange e leden, was `t `n hele toestand as der een fotograaf kwam. Ieder mos dan de zundagse kleare an en zorgen dat oe hoar mooi in de riege zat. Zo iemand was altied prominent anwezig op een feestje of broetlachte. Angstvallig heel ie den in de gaten want as ie veur de camere hen leep`n kreeg ie ne loage. Ok bie karkdiensten schoffelen de fotograaf op en oaver `t altoar. Oaveral leep`n dee terechte. In iedere familie was der ok wal iemand den een duur toestel had en die persoon werd dan in e zet as hoffotograaf. Den zwoager of breur leep dan ok oaveral moar terechte um mooi plaatjes te kunnen maken. Vake kekken dee specialisten doar heel ernstig bie . Zo zat ik `n keare bie een huwelijksmisse en de pastoor zol neet goan vroagen of `t echtpaar mekare van alles wol beloaven. Kump de fotograaf in de beene en wol oaver de veurste karkbanke hen kroepen, he bleef met zien lange jas an het heukske hangen van de kneematte en klats doar had ie hum liggen midden veur `t altoar.
Met een zoer gezichte verrees he wear boaven de karkbanken en zei: let moar neet op mien. Later kwam den besten man de foto`s brengen, `t was allemoale nogal wazig moar dat lag toch veural neet an hum. Want later op `t feest hadden de leu hum zitten ploagen telkens as he ne foto wol maken zaten de jongs der wat steule veur woar he dan oaver hen mos kroepen. Tegenweurdig is foto`s maken iets wat iedereeene de hele tied dut. Wij bunt der helemoale met oaver. Een selfie of wat dan ok der hoof moar iemand een scheet te loaten of dreekwart van de leu loopt al met de mobiel in de loch um der foto`s van te maken. Het argste doarvan is dat as ie argens op visite goat der um de paar tellen wal iemand zien mobiel veur oe neuze drukt um foto`s te loaten zeen. Ik hol der neet van zeg ik dan altied en ik had der mien ok nooit in verdiept. Tot ik afgelopen wekke met een paar kearls an `t koffie drinken was en `t gesprek ging oaver dickpic . Toen ik heurde wat ze doar met bedoelden heb ze mien smakelijk oet e lachen.
Ik zeg; wat veur zeeke geest bun ie eigenlijk as ie `t oe al in de kop haalt um doar een foto van te maken, moar `t dan ok nog goat doon en ze ok nog verstuurt. Ik kan der met de pette neet bie. Wat een stelletje smearpoetjes , dee bunt `t benul kwiet , opsluuten in een gesticht.
Nea dat zol de echte olderwetse fotograven neet oaverkommen. De fotograaf den een keare een familiefoto kwam maken bie ons zei netjes, Va en Moo in `t midden en de kinderen doar umme hen en de kolde kante an de boetenkante, mocht de verkearing dan ooit nog oetgoan dan kun ie ze der altied nog afknippen.
