NEEDE – Vrogger was dat een geregeld geheurde oetspraak, as ie `t neet lieke brouwen dan kreeg ie de wind van veuren. Bie ons in Beltrum was dat met al dee nonnen ok geregeld `t geval. Op de leagere schoole bleef ik ze moar tegen kommen. Ik heb ze nooit kunnen betrappen op onzedig gedrag moar heb wal geregeld `n klap op de oarne e had. Noe ik dan al dee discussies heur oaver de windmöllens,terwijl der ondertussen nog gin ééne steet, denk ik dat der hier en doar ok wal wat de wind van veuren mot hebben. Berkelland hef een plekske e vonden tegen de grenze an van Oost Gelre. Dit wurdt dan an e markt met zeukgebied K. Noe is dat gin wonder dat dit gebied zear geschikt is. Beltrum en Grolle lag zich nooit zo stark en in Beltrum hebt ze dan ok geregeld oaver Grolse wind. Noa dan is zoekgebied K zeer winderig.
Moar noe is doar een weidevogel natuurgebied e kommen en dee vogels veult zich doar prima thoes. Met name de Grutto en schienboar hef den vogel las van het geloed van de windmöllens, Berkelland dut dat handig want wat ze earst anmarkt als weidevogelgebied, schrapt ze dan ok zo wear van de kaarte. In de krante schrieft ze dat ze samen met Oost Gelre wilt optrekken zodat umwonenden neet verrast wurdt deur windmöllens. Ik geleuf dat ze dee joekels der in één nacht neerzet as ie dan smargens de gordienen lostrekt steet doar zon ding te soez`n. Volgens mien mot ze allemoale de wind van veuren hebben. Ons mooie landschap geet helemoal noar de mieter met oaveral van dee joekels in de loch. At ze der dan toch mot kommen zet ze dan an de kust doar weit `t altied en hebbe wij der gin las van. Moar dan steet der doar wal wear iemand op den ons de wind van veuren zal geven. Vroggere wiesheid was: van de wind kun ie neet leaven, moar dee wiesheid is al lange in e haald.
Zo noe goa ik hen fietsen tegen de wind in, wind van achteren zurg ik zelf wal veur.
