NEEDE Wet ie `t ,wet ie `t al, wij goat “neet” samen noar de stal. Het wurdt wear `n kale bedoeling met de feestdaage. Efkes nog gauw noar `t café hen of boeten de deure etten. Het kan wal moar dan mot ie der wal bietieds bie wean. Um vief uur geet alles wear dichte en heur ie wear thoes onder de boom te zitten.
Hoe kun ie dat noe gezellig maken? Misschien deur met pijltjes de ballen oet de boom te gooien. Ie zet dan nummers op de ballen en den wie de hoogste score hef mag de kroam opruumen. Ok kun ie ieder um de beurte de beelden in de stal goan verzetten een ander mag dan de boel wear good zetten. Zo hadde wij en hebbe wij eigenlijk nog, een stal van echte beelden. Ie kent dat wal de kameel zonder kop, de ezel zonder stat, de herder zonder stok een schoap zonder onderkantte. Disse beelden werden dan met plakband e liemt. Deur de hette in de kamer lee de liem los en had ie de meest rare figuren in en um de kribbe stoan. Ok het dak van de kribbe was half verkoold deur de kearse in de stal. Veur de zekerheid stond der ok altied `n emmer water noast de karsboom. Mocht de boel dan in de hens vleegen dan kreeg de hele beeldenfamilie een fatsoenlijke douche. Ne keare was der `n eume op karsvisite bie ons thoes, den eume was nogal kortaf in de proat . Um `t minste kon he al oet de sloffe scheten. He zat opvallend vreadig noas de karsboom en stok zich ne mooien dikken Hofnar an. Tevreaden zat he lekker an de sigaare te pulken. Alles was geneugelijk en mooi. Noa `n paar trekken van de sigaare, veal de sigaare hum van de lippe of achter `t hemp. Kearl wat kwam der `n arbeid in de kamer. Ik zoog `t gebeuren en smet de emmer water den bie de karsboom stond tegen hum an. Toen hadde wij `t schoap an `t drieten. Kearl wat ging den man tekear. Ie hebt nog nooit zowat e heurt onder de karsboom. Den engel vloog spontaan noar boeten hen. De dree wiezen en de kameel zonder kop gingen oet zichzelf achter de kasboom liggen. Een hele tied later sprok ie mien eume wear en `t ging natuurlijk oaver den emmer water, Opnieuw werd he kortan en zei: wieters von ik `t neet zo arg moar `t was zo zunde van dee mooie sigaare.
Hoppelijk kun ie hierumme glimlachen, ik wens oe allen fijne feestdagen.
