NEEDE – Sinterkloas is alwear in `t land . Dus `t gemas oaver de kleur`n van de Pieten geet wear an. As ie niks betters te doone hebt kun ie altied wal wat vinden. Het is net at deur corona iedereene nog mear begint te kalveren. Zal wal kommen dat de meesten mekeare te dicht op de lippe zit en zich dan noar boeten hen goat ofreageren . Noe is der wear `n beparkte lockdown en allerlei deskundigen goat doar dan wat van zeggen. Wat leu kriegt binnenkort de daerde prik en wat leu wilt neet e prikt worden.2g,3g, en zelfs al 1g. Wat der ok gebeurt der komp vast wear allerlei protesten oaver. Soms vroag ie oe of woar dee leu de tied vandan haalt, um steeds moar wear argens rond te goan lopen en te protestearen. Zo was der ok `n klimaattop in Glasgow.
Twee wekke lang hebt honderden leu overlegt en weinig kroet e schotten. Vremde der an is op `t vliegveld van Glasgow was `t nog nooit zo drok e wes as dee twee wekke. Liekt mien dat,dat ok neet bes is veur `t klimaat. Ok korter bie thoes wilt twee vrouwleu met ons oaverleggen oaver `t klimaat. Prima natuurlijk want wij bunt de boel wal een betje an `t verslakkeren met zien allen. As wij dan allemoale ietske minder zit te soppen kump `t vas wal good. Zo stoat der noe ok wear bl;adkorven van de gemeente langs de stroate. Het protocol hiervan is dat der alleen moar gemeenteblad in mag. Noe is dat makkelijker e zeg as e doane. In onzen tuin lig zowal mien eigen blad as gemeenteblad. Dus dat geet nog een hels karwei worden um dat blad te scheiden. Ik zee al een Boa bie de korf stoan um dat controlearen. Unmeugelijke dinge, bedacht deur iemand den der veur e leart hef nem ik an. Dat is al `t zelfde as dat ie met zien tweeën oaver stroate loopt en an oe moat vroagt; mag ik noe efkes in `t midden lopen.
