NEEDE – September is natuurlijk de oogstmoand bie oetstek.De boeren meit nog `n leste snit van `t land. Dit joar was natuurlijk biezonder vruchtboar en der bunt boeren die wal vief kear hebt in e koeld. As boeren bie mekeare zit kunt ze natuurlijk fantastisch oaverdrieven. Ik mag dat gearne anheuren.Zo dech iederen boer dat zien grond vruchtboarder is as den van de buurman.
Ik wet nog dat, dat een toestand gaf met de ruilverkaveling. Altied werd der e zeg op de grond van Hendrik wil nog gin onkruud greuie. Plots kreggen ze de grond too e wezen en toen werd der e zeg; nea dee grond van Hendrik is zeker zo good,as neet better as onze grond.Bie ons in de buurte van de waterster woonden den Hendrik. Gekschearend neumde wij hum wal gekke Henkie want bie Hendrik was `t altied iets better. Hendrik had `n stukske grond liggen bie de Leostichting kort bie `t fratershoes. Het land was in e pot met eardappel en Hendrik vertellen oaver de opbrengst van `t stukske land . De vrachtwagens reden op en af um alle eardappels op te halen.De eardappel waren zo groot dat ie ze met de greepe der hoaste neet oet konden kriegen.An `t end van den dag was Hendrik zien jonge kwiet. Zeuken en zeuken he was zelfs nog goan kieken bie de fraters. Op `t lest tegen de schemer an leep Hendrik nog een rondje um `t land hen en wat blik achter op `t eardappelland zat de jonge rustig in `t zand te wreuten achter `n groot`n eardappel
