NEEDE – An `t woord dummelig mos ik denken toen Rutte zich noa een wekke al neet mear kon herinneren wat e zeg had. Vrogger heb ik in `t mooie Reurle e warkt en doar werd dat woord nogal eens gebroekt. Doar kwam altied `n klant achter umme en den had altied dezelfde klachten. Hoe ik ok mien beste deed, he zag der altied wat an. Mien bazin zei dan altied noatied, doo moar niks op Anton oet he is luk dummelig an `t worden.Ne keare kwam he bie mien en toen maaken he `t wal arg bont.
He vlok mien de hoet vol want he had `n taarte besteld en neet e kreggen. Toevallig wis ik dat he der dee wekke neet was e wes want he was `n wekske noar Ameland e wes. Dus ik zei zo, Anton ie wazzen der veurige wekke neet dus dat is unmeugelijk en noe wij `t der toch oaver hebt oe gulpe steet los. Noa zegge volgens mien heb ie gin geliek en de gulpe heb ik los stoan umdat `t hier in de bakkerieje altied zo heite is. Anton was ok een fanatiek volger van VV Reurle en ik was fantiek bie Vios in Beltrum. Elken zundag as Reurle e wonnen had kwam he doarover neulen, as wij as Vios dan verloor`n hadden was `t veur Anton een feestdag. Kom toch bie Reurle voetballen dee oet Beltrum kunt der niks van. Later zag ik `t verband tussen zien geklaag en `t voetbal, as Reurle verloor`n had waren miene taarten ok neet good. Dus of he warkelijk zo dummelig was vroag ik mien af. In Beltrum zol wij zoiets as Rutte hef zeggen; den man is `t benul kwiet. Alzheimer of dement wazzen toentertied weurde dee neet gebroekt werden. Ok bie mien in de buurte wonen een older echtpaar met `n vriegezelle zunne . Oaver den jonge werd ok vaake e sprokken as de buurte op visite was. Den man was al wal zestig en werd behandeld as `n kind. S`oavons stond he dan stiekum achter de schuure `n sigaartje te reuken. Toen de jonge 65 werd bracht zien Va hum noar `t bejaarden tehoes.
De andere dag kwam de buurman langs um te vertellen dat de jonge neet mear thoes woonde. Ik heb de jonge gisteren noar de olden van daagen e brach ,doar is he noe mooi op plaatse. Wij konden hum neet mear thoes hemmen want zo noe en dan leep `t hum der helemoale deur hen. Dus loat wij hoppen dat onze landelijke bestuurders wear gauw bie zinnen komt, want anders mot wij die leu ok moar noar `n gesticht brengen, zoals ze dat vrooger zo mooi konden zeggen.
1 gedachte over “Fratsen Dummelig”
Bie oons in de buurte was ne jonge en den heetten freekie(?) hee skopte de bal terug ajj um’ verkeerd geraakt hadd’n, moa den jonge vertelln’ mie ooit es, in1960 ofzo dat den oorlog nog steeds nit veurbie was EN hé had geliek. Het is natuurlijk evident dat de heer mark rutte gisteravond zijn plannen voor de komende tijd uiteen zette, allenig deze jongen heeft geen visie en wil het liefst verder gaan op de oude desastreuze weg, wat een misser. p.s. oprotte rutte
Reacties zijn gesloten.