NEEDE – Gedoo hebt wie dervan de leste tied, `t lik wal of ieder der moar wat hen dut. Grappenmakerhaus holt zich neet an de regels en past dan noatied de regels an . Joa zo kan ik `t ok ,leu zeggen hoe ze `t doon mot moar zelf der neet noar doon. Dat is al `t zelfde as hen fietsen goan zonder fietse. Ie zegt moar dat ie `t neet zo bedoeld hebt en maakt oe oprechte excuses dan wordt ie dus neet vervolgd. Ok den rapper(leas repper) bedoelen der niks van wat he allemoale oet kroamt op twitter en op de Dam. Kiek, ok gin boete `t is toch wal een hele beste jonge. Wat mot wij doar noe met an. Ik zee `t al veur mien dat der allerlei leu dinge doot dee eigenlijk neet meugt en dan sorry zegt en doar met weg komt. Dat is ja `t zelfde as ie goat stoan pissen tegen de wind in en zegt dat ie neet nat wordt.
Grote schande allemoale . Neet te verglieken met die dree leu dee boeten een gebakje an `t etten wazzen en doar `n boete veur kreggen en een vermelding in `t strafblad of den boer den de grond beschikboar had e steld veur de trekkers van `t boerenprotest. Zo krieg wij nog mear onduudelijkheid in ons land. Zo was der onlangs een lilliputter an e klaagd den zol een vrouwe verkracht hemmen, stoande beens. Het kearltje was amper 1 meter vieftug en de vrouwe was zeker 1 meter viefentachtig. De rechter vroog an de vrouwe hoe dat in vredesnaam meugelijk was, de vrouwe krig een luk rooie kleure en zeg: joa ik mos wal luk deur de kneene zakken. De vrouwe mos 1x sorry zeggen en `t kearltje 3x .
