NEEDE – Gedoo over windmöllens bie ons an de rand van `t darp. Um allemoale zo greun meugelijk te worden mot der joekels kommen te stoan van 250 meter hooge. Dus um een klap van de mölle te kriegen mot ie beheurlijk kunnen springen. Ok het lawaai zal neet aangenaam wean as ie dan efkes boeten bunt zul ie steeds heuren; zoef,zoef,zoef,zoef of as der vulle wind is zoefzoefzoef en bie kalme wind;zooooooeeeeeef,zoooooeeeef. Bovendien krieg wij ok las van slagschaduw in `t darp. Dus as oe dan iemand van binnen zal vroagen wat veur wear is `t boeten, zul ie kunnen zeggen; der is zunne ,o nea schaduw o toch zunne o nee schaduw enz. .
Degene binnen zol dan kunnen denken dat ie een klap van de mölle heb e had. Mensen dee windmöllens zet, zo dicht bie een darp heb dus duudelijk `n klap van de mölle e had. Kevin `t roadslid van de VVD gaf onlangs in de krante al an dat der nog steeds vulle in de achterkamertjes gebeurt op `t gemeentehoes. Het veel hum vies tegen um wat gedoan te kriegen in de politiek. Soms mot he argens veur stemmen terwijl he tegen is, beroerder kun ie `t toch neet kriegen. Jammer dat een jong fanatiek roadslid hierdoeur verloren zal goan. Zo had ik onlangs de anhanger achter mien auto e doane, toevallig kwam der `n bekenden anlopen woarvan ik altied al dacht den hef `t neet allemoale op de riege, moar good, ik vroag zo; wil ie efkes kieken of de achterlampen `t doot?? Joazeker zeg he. Ik doo `t lech an en he schreeuwt; ja ,ik trap op de remme en he schreeuwt ja. Ik doo `t knipperlech an en he schreeuwt ja,nee,ja,nee,ja,nee ik denk dat der `n droad loszit want he geet steeds an en oet. Ik bedank hum vrendelijk en zei hum dat he neet tekort mear langs de Needse mölle mag lopen.
