NEEDE – Noe in disse virustieden misse wij `t geproat met anderen. Der is toch niks lekkerder dan oaver een ander te proaten as he der neet biezit. Moar as der dan ok geen leu zit dee `n wearwoord hebt is doar ok gin zak an. Vergangen wekke had ik wear eens ne keare `n verjoardag in de tuin. Wij heelden an `t begin netjes gepaste afstand , moar helaas noa `n paar piepkes schoaf ieder hendig toch noar mekeare hen. An `t begin was de verjoardag loedruchtig deurdat wij zo wiet van mekare af zatten en later was `t loedruchtig umdat ieder nogal e snoaven had. As leu luk wat op hebt ,wordt ze dover duch mien.
Der zat ok zonne jongen snuiter den schreeuwen hoaste bie alles wat he wol zeggen. Ik zeg zo: foj ,foj wat goa ie toch te kear, het lik wal of ie hellig bunt. He kek mien an met ziene rooie eugskes en zeg: helg? Ikke? Ik bun ja nooit hellig en ik schreeuw ok nooit,ik proat alleene hard. Noe stond doar bie dee leu `n groot`n walnotenboom, een echt prachtigen boom. Ik vroag zo an de eigenaar komp der nog een betje nutten an den boom. Noa zeg he dat ligt deran. Ik zeg dat ligt deran?? Joa zeg he, den boom hef gebroeksanwiezingen. As ie der langshen loopt dan deen ie efkes te knikken en één keer in `t joar mot ie hum dree keare sloan met de knuppel. Joa, zeg he; noe zul ie wal denken dat ik neet wies bun moar de veurige eigenaar hef mien dat e zeg en `t earste joar dacht ik ok wat een kul. Moar toen een keare gin mense kek heb ik de boom toch moar efkes too e knikt en dree stokslagen e geven. Het joar doarop zat den boom knettervol, dus vanaf noe doo ik dat ieder joar. Noe heb ik bie thoes `n appelboom stoan woar ok amper `n appel an kump ieder joar. Dus ik noa de verjoardag noar den appelboom hen. Ik bun der heel kort bie goan stoan en heb e fluusterd; as ie meent dat ie ieder joar moar twee appels hoof te geven dan zaag ik oe volgend joar van de sukke . Ik bun benieuwd of `t helpt,ik zal oeleu op de heugte hollen. As ie dan neet met leu kunt proaten dan is der altied wal argens een boom um tegen te proaten.
