NEEDE – Ik kan natuurlijk in disse crisistieden oaver van allerlei dinge schrieven die der echt too doot. Moar wiesheid heure wie al mear dan genog van experts en zogenaamde experts. Ik heb helaas neet wieter e laert veur dokter dus dan wil ik mien, der ok neet met bemeuien.Loat ik moar eens probearen of ik jullie nog `n lach op `t gezichte kan toveren. Opmarkelijk is wal dat de hoesartsen begint te klagen dat ze `t te rustig hebt in de sprekkamer. Noe wij leu een betje bange bunt veur mekeare, mankeart ons ok een stuk minder liekt `t wal. Anderhalve meter afstand hollen is schienboar gezond veur ons.
Kun ie oe toch hoaste neet veurstellen. Zo zit de sprekkamer elken dag brekkende vol en noe kump der zowat gin mense mear. Ik zat der onlangs ok ne keare en noast mien zat der ok ne kearl met ne vuurrooien kop en as he oetoademen leet he almoar `n klein windje.
Ik kek eens hendig onder zien stool en doar lag al een pleske water.Ik denk noa den is wal biezonder dunne op den mest. Ik leet hum dan ok met plezear veurgoan want de loch dee he bie zich droog was ok wiet van fris. Ik heurde de dokter een tiedje later in de sprekkamer hartelijk lachen en den kearl kwam der met `n hellig gezichte oetzetten. Een tiedje later kwam ik den man tegen bie onze winkel en nieuwsgierig dat ik bun , vroog ik hum wat was dat noe lest bie de dokter. Ach zeg e , miene vrouwe is neet wies. Ik zeg, oene vrouwe den was der ja gaar neet bie. Nea zegge, moar ik had luk las van de darme en van de dokter zetpillen e kreggen. Ikzelf kon de kleine letterkes neet leazen moar miene vrouwe dach van wal. Ze had e laezen 3x daags 1 pil innemmen via de achterkante met vulle water.
Dus as ze mien dan zon pilleke in de kontte drukken zat ze der noatied `n trechter op en dan goot ze der `n halve emmer water achteran. Ik vroog nog is dat neet tevulle? Nea zeg de vrouwe better tevulle as te weinig want sloeken kun ie doar neet.
