NEEDE – Het Virus hef ons good te pakken. Deur de ganse weareld hen is iedereene oet zien doon.
Natuurlijk komt der dan ok allerlei deskundigen an `t woord, met beroepen woar wij nog nooit van e heurt hebt. Ik goa ze moar neet allemoale opneumen want dan brek ie oe de tonge en dan heb ie der nog `n last bie. De earste waarschuwing was um met neet mear dan 100 man tegelieke argens te verblieven. Noe werden der ok dinge meteen of e last woarvan ik zul denken; ie zullen hoppen dat der ooit 100 noar oe hem zullen kommen. Wij mot in dissen tied een betje bie mekeare oet de buurte blieven en `t leefst neet an mekeare zitten.Der bunt ok leu dee duftig an `t hamsteren goat. Het veel mien op dat een arg gewild artikel kontpapier is.
Vrumd ,vrumd want `t lik mien as ie neet wat te etten hebt, ie ok gin kontpapier neudig hebt.
In vrogger tied zollen ze zeggen; nem moar ne krante met, um oe gat of te veagen. Raar is dat, dat kontpapier `n soort van earste behoefte is in tieden van nood. Ik zol toch earder an etten denken. Noe neumen ik dat net van `t krantenpapier,moar dat gebeur`n vrogger wal. Wij hadden kundigheid an `n paar heel zuunige leu, as ie doar noar de pot gingen had de vrouwe netjes stukskes krantenpapier oet e knipt woar ie oe dan met mossen redden. Ne keare op de visite zeg dee vrouwe dee ok nogal een beste batterieje had, mien kearl dut leste tied zo raar,
volgens mien lup `t hum der een betje deurhen. Met `t noar berre goan zet he de brille op en mot `t lech anblieven. Noa zeg den kearl zo vremd is dat neet want as smargens den krantenboer kump dan nem ie den altied meteen met noar `t huuske. As ik dan soavonds geluk heb en de krante hef good of e geven dan kan ik tenminste `t nieuws nog efkes leazen.
