Fratsen Laks

BERKELLAND – De naam zegt het al laks. As wij vrogger iemand laks vonden dan was `t een luizak zon figuur den moar wat hen en wear an `t gengelen was zonder iets te doon. Ie wet wal van dee mooi proaters zoas, haal ie koffie of blief ik zitten. As de toafel netjes e dekt is en ie per ongeluk de vurke bunt vergetten dat den dan zeg; bunt der gin vorken mear? Moar dat is schienboare een andere laks dan wij bedoeld.

Laks is een scholierenorganisatie, Landelijk Aktie Komitee Scholieren. Dit komitee vund dat der anders e proat mot worden veur de klasse. Zo mag de learkracht neet mear zeggen goeie smargens meisjes en jongens moar dat mut worden; dag leerlingen. Blieven zitten mag ok neet mear dan goat ie een joar doubleren. Klunk wal een stuk interessanter natuurlijk; onze Pietje geet dit joar doubleren he is der zo secuur an dat e alle klassen twee keer dut. Tegen de tied dat Pietje van de leagere schoole afkump kan he `t leste joar zowat met de auto noar schoole. Mits Pietje tenminste `t reebewies haalt want doarveur zakken mag natuurlijk ok neet mear.

Vrogger lachten ze oe oet as ie zakt waren en noe zal `t zoiets wean as: Pietje krig een herkansing dus ie bunt eigenlijk neet e zakt moar ie mag nog een keare. Wat een gedoo allemoale ie zollen ze toch. Dan kump den Franse president hier en komt de Fransen hier protestearen oaver hun pensioen. Potdimme doar geet het nieuwe pensioen in op 64 joar en wij stoat der bie te gapen en mot tot 67 joar. Ons land is der een betje met oaver as ie `t zo bekiekt. Wij maakt toestanden oaver de Poaskearl , zwarte Piet en de leagere schoole. Dee Fransen gingen vief joar earder met pensioen en in `t nieuwe 3 joar earder. Snappen doo ik `t neet moar ik denk dat wij onze andacht toch neudig mot verleggen van woar `t warkelijk um geet. Of zulle wie lekker laks langs de kante blieven stoan.