NEEDE – Steeds mear leu of zogenaamde deskundigen buugt zich oaver van alles wat met onze gezondheid te maken hef. Ik zol zeggen hol het bie thoes in de riege dan bun ie der al drok zat met. As ie soavonds geneugelijk met oe familie een potje bier kunt drinken zonder mekaere af te gadden is dat toch het mooiste wat der is. Geneugelijk onderoet met de veutte bie de kachel een hearlijk sloapmutske drinken woar ie lekker op kunt insloapen. De dikke sigaare mag allange neet mear en al helemoale neet binnen.
Moar noe hebt onderzeukers oet e vonden dat ok het gleaske wien of bier neet good veur ons is. Mot ze noe steeds an dinge zitten trekken dee het leaven luk angenamer maakt. Op gebak traktearen ,een lekker kroketje, dikken gehaktbal neet doon want dat is slecht veur oe en mien. Dat wurdt dan met vulle ophef e schreven in de media. Dat de gezelligheid en geneugelijkheid doar met vot geet zegt ze der neet bie. Bun ie gelukkig in de kop dan is de gezondheid ok vake top. Ie hoof natuurlijk gin hele kiste bier of flesse jenever leug te drinken moar met moate is het gewoon gezellig en doar kun ie hearlijk op liggen.
Adam en Eva zondigden ok en wij doot het stief vedan. Ze mochten neet van de appels etten en dan noe zeggen dat wij juust mear appels mot etten. Volgens mien is dat tegen de regels in. De earste slieters bunt der al dee gin drank mear verkoopt met alcohol. Noe het cafe nog woar gin borreltje mear is te kriegen. Zal der misschien al wal wean argens in het westen. Lekker noa twee glaaze ranja de polonaise sjoksen. Ok het hearlijke gedram an de tap zal dan langzaam oetstarven en dat is ok zunde natuurlijk hearlijke, domme cafeproat woar ie gin mense met lastig valt. Zo heurde ik lest van iemand den soavonds in `t cafe was ewes , zeg bakker heb ie dat e heurt van den kearl van veerendartig oet Borculo? Ik kiek verschrikt op en zeg nea heb ik niks oaver e heurt, watdan? Noa zegge, den wurdt morgen viefendartig. Bulderend van `t lachen leep he wieter, ik denk noar `t cafe hen um een nieuwe mop te heuren.
