Fratsen neet te volgen

NEEDE – Heb ie dat ok wal es dat ie der niks mear van snapt? Noe volgt een paar onnavolgboare berichten oet `t dagelijks nieuws. Rutte stelt 100 miljoen en nog een kleddeke beschikboar veur `t klimaat in de darde weareld. Rutte geet wear argens zien excuses anbieden kost ok wear miljoenen. Earst goat der twee vrouwelijke ministers noar Kiev um miljoenen an te bieden en dan geet Hoekstra der hen um der nog een schepke bie op te doon. Noe mos den wal vernemsig oetkieken en dree uur in de schuulkelder zitten. Der goat leu met patat en snart hen um oet te delen terwijl hier de voedselbank steeds drokker wurdt. Hard warkende mensen hier dee failliet goat deur te hoge lasten. Ok wij mot de boksreem aardig anhalen um boaven water te blieven. Veel collega`s mot al noodgedwongen stoppen deur te hoge energieprieze en grondstofkosten. Het geval van een hardwarkende collega oet Broabant wil ik toch efkes neumen, smoandags was he nog los ewes en moandagoavond had he beslotten um te stoppen der mos dikke geld bie. Joarenlang snachts um 1 uur oet berre tot noa de middag warken in de bakkerieje en dan zo pardoes an `t ende kommen.

Ik zag den man stoan huulen in zien zaak. Ik kreg der kolde rillingen van. De boeren dee joarenlang hard e warkt hebt um een mooi bedrief op te bouwen doar wordt amper noa umme kekken, gladdekkels dee nog nooit persvoorloch heb e rokken beslist oaver hun. Um dan terugge te kommen op `t bovenste stukske, weurumme gebroek e wij `t belastinggeld neet earst um zelf de boel op orde te kriegen? Moar `t fraaiste is toch nog dat der leu bunt ewes dee klagen oaver de intocht van Sint . Ze vonden `t schande en milieu vervuilend dat Hij met `t vleegtuug kwam. Terwijl dat ding gewoon op de grond is blieven stoan. Ik kan der met de pette neet mear bie en ik denk menigeen neet. Zo en noe goa ik earst efkes een ulk oet de kniepe doon en doarnoa mien mond speulen. Hoppen dat wij `t benul ooit nog wearkriegt.