NEEDE – Wat een gedoo is `t toch,iedereene mut mear betalen deur de hooge energieprieze,moar snappen kun e wij `t neet. Ollie maatschappen dreit woekerwinsten deur de hoge gasprieze. Wij betaalt ons scheal an gas en stroom. Prieze van,van alles en nog wat goat deur `t dak hen. Iedereene klaagt steen en been. Moar dan is der vakantie en op Schiphol is `t nog nooit zo drok e wes. Wat een gedoo. Hele daage klaagt menigeen oaver `t klimaat en dit en dat ,moar dat geet neet op as ie op vakantie goat. Dan versmear wij alles wear, um doarnoa thoes wear op `t klimaat te letten.
Heel biezunder toch ,as ie doarover prakkezeart. Der was al een woord e vonden um neet mear te vleegen; vliegschaamte!! Ok de boeren doot doar an met, het is mien op e vallen dat de boeren dee oetekoch bunt inzake hun oetstoot ,noe allerlei vleegreizen goat maken, want toen ze `t bedrief nog hadden konden ze nooit op vleegvakantie. Heel biezonder. Dus loat wij `t moar neet hemmen oaver hoe klimaatvrendelijk wij bunt, wij bunt alleenig klimaatvrendelijk as `t ons in de knippe oetkump. Dat geet denk ik op veur ieder van ons. De oorlog den der noe is ,is natuurlijk verschrikkelijk moar um dan de prieze van alles te verheugen en oezelf te verrieken met dat als excuus is wal barre. Ik geleuf dat alles inens oet dat gebied kump. Ik wet hoaste zeker dat as disse ellende af e loop`n is en der argens anders oorlog oet zal brekken dan inens alles doar vandan kump. Vrogger as wij zatten te klagen zeiden de olde leu vaake; ie mossen de oorlog eens met e maakt hemmen dan heel ie de kop wal dichte. Het is neet te hoppen dat wij dat later ok wear kunt zeggen.
Het is natuurlijk te gek um los te lopen dat dit in onze huidige tied en met ons verstand nog gebeurt. Leu die op andere leu scheet um land te annexeren of `n wil op te leggen. Wat een gedoo. Zo ging bie ons ok de mealpries umhooge terwijl onze baktarwe oet Frankriek kump. Ik zeg zo tegen de mealleverancier wat is dat noe? Noa zegge dat kump deur de oorlog. Ik zeg bunt ze in Frankriek dan ok an `t vechten? Nea zegge e moar `t kan wal natuurlijk.Onlangs was der een zandstorm oet de Sahara den bie ons op dak nearkwam moar dat was gin zandstorm. Het was stoefzand van de polonaise dee de sjeiks leepen in de woestijn. Deur de hooge ollieprieze zongen ze Koeweit,Koeweit,Koeweit kiele ,kiele hopsasa.
