NEEDE – Kiek ie ok voetbalwedstrieden op `t EK ?? Dan vin ik `t altied mooi um de aparte dinge te zeen. Zoas `t publiek dat zut dat ze in beeld komp en inens onwies begint te massen en springen. Of de trainer den met een hand veur de mond steet te proaten. Zelfs de voetballers proat met een hand veur de mond. Ze bunt dan waarschijnlijk bange dat wij allemoale kunt lipleazen en dat belangerieke nieuws dat hun te melden hebt mag wij neet heuren of zeen. Ik denk dan bie mien zelf ; schei toch oet kiezemenne dat ie der rondloopt of wij doar wakker van ligt. De meesten bunt deur toeval en talent an de top e kommen neet umdat ze der joaren veur noar de hooge schoole heb e mot. Dus wat dee leu tegen mekeare oetkroamt wat wij neet mag wetten is natuurlijk mooi um hardop oaver noa te denken. Ik denk dan dat `t veural simpel is zoas; he heb ie dat mooie dearntje e zeene op de 2e riege? Antwoord: nea woar,woar o doar,doar .2e riege kump dat noa de earste riege?? Joa en veur de daerde riege.
Ja as ie neet vernaam bunt kun ie oe vernaam maken natuurlijk. Ok dee onzin van beslotten trainingen en systemen oet probearen. Dan zit der veur en noatied ok in de studio nog een paar van dee kwakzalvers dee dat dan allemoale oet goat leggen met een ernstig gezichte. Weurumme neet spontaan allemoale oetendelijk geet `t derumme dat ie 1 goal mear maakt as den ander.
Hoe ze dat doot en met welk kapsel of tattoo mek niks oet `t geet um `t winnen. Wij gingen vrogger de weide in met moar 1 opdracht zurg dat ie den bal tussen de poale jaagt. Cornerballen mot veur e zat wodden op melkbussen heugte op de penaltystippe. Neet pingelen achterin moar vot met dat ding.
Simpel en makkelijk eigenlijk hetzelfde as noe…. toch???
