NEEDE – Onlangs schreef ik ne keare iets oaver een escortbureau, doar warkt van dee vrouwleu dee ie kunt bellen as ie argens van of mot. In dat artikel stond ok de ultieme dreum van ieder is um ne keare `n trio te doon. Noa leu, de dreum kump dit joar oet. Iedereen mag neet mear as dree personen ontvangen. Dus wij viert met zien allen een triokerst. Noe hoof ie van mien neet speciaal in de blote konte onder de karsboom te goan liggen moar `t mag wal. Noe heur ik links en rechts dat het dan toch moeilijk is, um te kiezen welk trio ie oet mot neudigen en wie ie mot zeggen veur oe is gin plaats in de herberg. Bij wat van de familie zol ie kunnen zeggen Annie mag wal kommen moar den kearl van oe neet of Gait is welkom moar loat oe Mientje moar thoes. Dat is toch neet arg de karstgedachte. Met moar dree gasten heb ie neet vulle te willen met zien allen. Ie zollen hoaste denken dat `t echte karsverhaal oetkump. Jozef en Maria konden ok nargens terechte in dee tied en mossen zich behelpen in `n schoapenstal. De koningen waren met zien dreejen hun tied al wiet veuroet. Ok de herders stoat bie menig stalletje met dree. De os de ezel en de engel bunt der ok dree. Toen hebt ze zich der good met e red en dan mot wij dat in dissen tied toch zekers kunnen. Loat wij ons allen der strak an hollen des te earder bun wij der hoppelijk van of.
Een joartje kasmissen vieren via beeldbellen is noe een meugelijkheid en as `t begunt te vervealen, dan druk ie op oet en kun ie rustig blieven zitten onder de boom en dat zol neet kunnen as ie tien man visite hebt dee noa luk wat wien begint te neulen.
