NEEDE – Onze gemeenteroad begunt zich een betje te reuren,ze denkt volgens mien dat ze neet serieus genog wordt e nommen. De wetholder hef `n dealtje e slotten met pro-wonen en dat is volgens de road neet helemoale goane zoas `t goan mot. Ik heb `t stukske e leazen in de Tubantia en veur kennisgeving an e nommen. As wij dan toch zovulle geld tekort komt met zien allen dan dut den lesten ton der ok neet mear too. Want ze hebt `t wal oaver bespoaren op van alles en nog wat, moar ik zag met eigen ogen dat der iemand van de gemeente an `t wark was bie de Waterster. Ie wet wal dat bos tussen Beltrum en Borculo. Tot mien grote verbazing was den man an `t bladbloazen in `t bos.
Met `n soort van trekkertje reed den man oaver de bospaden um `t blad wieterop in `t bos te bloazen. Ze zegt wal eens dat is dweilen met de kraane los en dat kwam hier wal helemoale tot oetdrukking. Ok umdat der nog `n hoop beume bunt dee alle blad neet hebt loaten vallen. Ik zal neet raar opkieken as der volgende wekke wat an de gange bunt um `t blad van de beume of te schudden. Ik zee de advertentie al stoan: gevroagd, boomschudders of bladplukkers . Bie ons in de buurte woont ok diverse leu dee neet al te bes met de tied weg kunt kommen.Zo ken ik der eene den ok alle joar as `t blad begunt te vallen, bie ziene beumkes `t blad der zelf aftrekt. Ik heb hum doar al eens op an e sprokken en e vroagt wat e an `t doon was. Noa zegge e, bakker, ik trek het blad leever met de rechte rugge van den boom of dan dat ik met de krommen pokkel `t van de grond mot oprapen.
