NEEDE – Noe wij neet zovulle mear boeten de deure meugt kommen zit wij mekeare mangs tekort op de lippe. Hierveur bunt der dan wear deskundigen in te huren dee oe zegt wat ie neet of wal mot doon. Mear thoeswarken is natuurlijk bie vulle beroepen neet an de hand. Ik zee de slager neet in thoes `n varken slachten of onze bakkers in hoes brood bakken veur onze winkels. Ok de bouwvakkers kunt in de kamer gin muurtje metselen, um dan op de rugge met te nemmen noar de bouwplaatse. Noe las ik in de krante wat thoeswarkers mossen doon um kreggel te blieven. Kiek zo noe en dan op van oe beeldscharm noar boeten hen. Goat um `t kwartear efkes stoan. Drink neet tevulle koffie moar ok veural neet te weinig. Loop tussen de middag efkes deur de buurte hen umm de beene te strekken. Haal oe wat lekkers bie de lokale vakman en goat der veur zitten um `t oe te loaten smaken. Veur luie leu is dissen tied natuurlijk fantastisch. Ie stoat smargens op en loopt zo in de kamerjas noar oe wark hen.
Um elf uur loopt dee leu nog zonder kleare deur thoes hen. Noe heb ik en misschien ie ok wal, `n kennis den ok veur de virus de kantjes der altied al of leep. Leever lui dan meu, moar as ie hum soavonds sprak dan was he toch altied drokker e wes as menigeen. Ik heb `t idee dat dissen man in disse tied nog luier is e wodden. Brood halen vundt he te geveurlijk dus dat mos ik hum efkes brengen. Ik had de stoette op `t aanrecht e legd en he zeg; wol ie nog effen een snoette koffie drinken? Ik zeg joa doar heb ik wal zinne an. He reart noar zien vrouwe en zeg; too mense geet eens vlot koffie in want de bakker hef neet vulle tied. De vrouwe deed ons netjes koffie met `n keukske en kwam der efkes geneugelijk bie zitten keuvelen. Toen ik mien komme leug had zeg den man vroagend tegen zien vrouwe; too geet ie der nog een komme bie in of zal ik blieven zitten.
