NEEDE – Noe is `t neet mien gewoonte um vanaf disse plek oaver mien bedrief te schrieven. Ik wil de stukskes altied open hollen en luchtig en neet as reclame artikel. Moar wat ons allemoale gebeurt bie de olde bioscoop is zo dolkomisch en van de gekke dat wil ik oeleu neet onthollen. Toen wij beslotten um der een markthal van te maken was iedereene dolenthousiast, zelfs `t college had ik veurtied mien plannen oet e leg en ze bunt allemoale weazen kieken. Toen wij onder in de zaale rondlepen zei de burgemeister zelfs ,gaan met die banaan. Tutdat wij de bananen der in hadden liggen. Toen brak het geweld los. Dit mag neet ,zus mag neet, dat mag neet.
De visboer is van narigheid al vertrokken en de groenteboer hef der moar een winkel van e maakt. De slager steet der nog steeds moar mag neet boeten stoan een meter wieter binnen mag wal. Dit hef dan te maken met staanplaatsvergunningen. Ik mag op de eigen grond veur de bioscoop wal oetstallen moar neet verkopen. Dus as de slager de kasse 1 meter wieterop zet onder dak, dan zol he wal boeten meugen stoan. Hoe gek wil ie `t hemmen. De boa’s bunt al mear dan dartig keare bie ons e wes en komt nog steeds hoaste wekkelijks. Zo wordt `t ondernemmen in Berkelland neet better. Wij veult ons zwoar belemmerd deur de gemeente en hun starre holding. Ik kreg zelfs een mail woarin oet e leg stond weurumme ik der neet mocht stoan. Een hoop gelal en veural gin duudelijkheid ,moar `t mooiste antwoord was wal weurumme ik doar niks mocht; dat is noe eenmoal zo. Joa,joa as ie `t neet mear wet dan is dat noe eenmoal zo. Zelfs in gesprekken met de gemeente werd dat e zeg `t is noe eenmoal zo. Ik zeg zo tegen de betreffende ambtenaar; doar kan ik toch niks met?? Want wat ik wal wet is dat ie van een kop koffie better kunt pissen dan van een toeten spiekers en dat is noe eenmoal zo!!
