NEEDE – Gedoo in de karken um ons hen. In Leevelde hebt ze `n concert e geven in de karke den deur `t bisdom neet good e keurt was. Toen had ie `t schoap aan `t drieten ,um `t moar eens olderwets te zeggen. De pastoor had ok stiekum op YouTube e kekken en ezeene dat `t kark onweardig was. Deur dit optreden was de karke ontheiligd in ziene ogen. Noe doot ze in de Reetmölle ok geregeld wat anders dan bidden in de karke en dee vonden dat de pastoor te wiet ging hierin. Ok doar kreg de pastoor loch van en het ganse bestuur is ontslagen. De leu oet Reetmölle bunt de wekke derop hen protestearen e wes bie de karke in Grolle.
Met vlaggen en blauwe shirts bunt ze de karke in e goane en hebt doar `n gedeelte van de viering met e maakt. Ze kreggen nog efkes `n dreugen um de oarne van de pastoor den de preake heeld oaver graan en onkroed. Zelfs in de karke mot ie noadenken. Doarop beslotten de actievoerders um roem veur `t zingen de karke oet te goan.Bun benieuwd hoe dit allemoale af zal lopen. Zo is der in Lechtenvoorde al eens `n pastoor e wes den `t ok neet lieke had met de geleuvigen. Op ne keare beslot he doarover te goan preaken. Beste mensen zeg he, ik wet dat jullie mien allemoale neet meugt , moar dat is andersumme net zo. Ik vindt dat jullie `t nog neet weard bunt um deur de katten bezeikt te worden. Tjonge jonge dat kwam an de karke leep biekans knetter leug. Het bisdom tikten den pastoor op de vinger en he mos ziene weurde bie de earst volgende viering terugge nemmen. Zo gezegd zo gedoan. De pastoor begon de preake met ; ik heb veurige wekke e zeg dat jullie `t nog neet weard waren um deur de katten bezeikt te worden. Bie deze nem ik dee weurde terugge : jullie bunt `t wal weard.
