NEEDE – De politie, vrogger neumde wij die Bromsnor of veldwachter. Bie ons is al een paar keare in e brokken en dan was der nooit nargens politie te vinden. Ik kreg ze dan as `t leed al geschied was te zeen. Sporenonderzeuk en van alles nog wat,moar nooit heb ik vernommen dat der ok moar iemand was op e pakt den an mien spul had e zetten. Noe is ons bedrief better beveiligd en heb wij oaveral alarm zitten, `t is zowat zo slim dat as ie soavonds noar de bakkerieje wiest het alarm al zowat ofgeet. Veur een paar wekke terugge was `t ok wear zowiet,de alarmcentrale bellen mien op veur `n inbraakalarm en ze hadden veur de zekerheid ok de politie e belt. Ik op mien fietske noar de bakkerieje en ik wil net afstappen ,ie geleuft `t neet, stoppen der ok al een politieauto. Samen bun e wij noar binnen e goane en de agenten hebt alles deurzoch.
Gelukkig was der niks loos moar `t gaf mien toch een good geveul dat de politie der zo vlot was. Kundigheid van mien oaverkwam het heel anders, de kearl was soavonds met ziene vrouwe in `t nus e kroppen tut de vrouwe meende dat ze wat heurde onder in `t veurhoes. De kearl mos deroet um te goan kieken. De vrouwe schreeuwen nog noa : ok onder de divan kieken. Het bleef lange stille onder tutdat der opens `n gevleuk los kwam of der wal zes man in de kamer was. De vrouwe in paniek en rearen ; mot ik de politie bellen!! Stond de kearl doar met de divan in de hande , de vrouwe zeg: zit der iemand onder?? Nea schreeuwt de kearl moar dat zwoare kreng schot mien oet de hande precies op de groot`n teen.
